ބައެއް ފަރާތްތަކުން ގައުމުގެ ހަމަޖެހުމެއް ބޭނުމެއް ނޫން: ރައީސް
ބައެއް ފަރާތްތަކުން ދައްކާ ވާހަކަތަކުން އިހުސާސް ވަނީ ގައުމުގައި ހަމަޖެހުން ބޭއްވުމަށް ބޭނުންނުވާކަންކަމަށް ރައީސުލްޖުމްހުރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ހިޔާގެ ރައްޔިތުންނާއި ބައްދަލު ކުރައްވާ ދެއްކެވި ވާހަކައިގައެވެ. ރައީސް ވިދާޅުވީ، ރާއްޖެއަކީ ވެރިކަންތައް ބަދަލުވެގެން އަންނަ ހިނދު ބަދަލު ހިފުމުގެ ރޫހެއް އޮތް ގައުމެއްކަމަށެވެ. އަދި ކުރިން ވެރިކަން ކުރެއްވި ބޭފުޅުންނާއި ސިޔާސީ ބޭފުޅުން ޖަލަށް ލުމުގެ ނުބައި އޮއިވަރެއް އެނބުރެމުން ދާ ގައުމެއްކަމަށެވެ.
ނަމަވެސް އެ ބަދަލު ހިފުމުގެ ރޫހު ނައްތާލައްވަން ޖެހޭ ކަމަށް އެމަނިކުފާނު ވެރިކަމަށް ވަޑައިގެންނެވުމަށްފަހު އަދި އޭގެ ކުރިން ވެސް ގަބޫލުފުޅުކުރެއްވި ކަމަށް ވިދާޅުވިއެވެ. އަދި މި ގައުމަކީ ހަމަޖެހޭ ގައުމެއްގެ ގޮތުގައި ބޭއްވުމަށް މަސައްކަތްޕުޅު ކުރައްވަމުންގެންދަވާ ކަމަށް ރައީސް ވިދާޅުވިއެވެ.
"ބަދަލުހިފުމުގެ ރޫހެއް ނެތް، ބޭނުންވަނީ ހަމަޖެހޭ ގައުމެއް، އަޅުގަނޑު އެކަން ގަބޫލު ނުކުރަން. އަޅުގަނޑު ކެމްޕޭން ތެރޭގައި ވީ ވައުދަކީ ބަދަލު ނުހިފާނެ ވާހަކަ، ބަދަލު ހިފުމުގެ ރޫހު ނެތިގެންދާ ހަމަޖެހޭ ގައުމެއްގެ ގޮތުގައި ބޭއްވުމަށް މަސައްކަތް ކުރަމުން މިދަނީ." ރައީސް ވިދާޅުވިއެވެ.
ރައީސް ވިދާޅުވީ، އެ ހަމަޖެހުމުން މި ގައުމަށް ގެނައުމަށް މަސައްކަތް ކުރާއިރު ބައެއް މީހުން ދައްކާ ވާހަކަތަކުން އިހުސާސް ވަނީ ގައުމުގައި ހަމަޖެހުން ބޭއްވުމަށް ބޭނުންނުވާކަންކަމަށެވެ. އެގޮތަށް އެކަން ކުރަން ތިބި ބައެއްގެ އަތްމައްޗަށް މަޖިލިސް ދޫކޮށްލާފިއްޔާ އެބޭފުޅުން ބަދަލު ހިފުމަށް ހަމަނުޖެހުމުގެ ތެރެއަށް ގައުމު ގެންދަވާނެ ކަމަށް ރައީސް ވިދާޅުވިއެވެ.
ދޭދޭ އަފްރާދުންގެ މެދުގައި ހިތުގައި ހުރި ހިޔާލުތަފާތުވުންތަކާއެކު މައާފު ކުރުމާއެކު ގައުމީ ވިސްނުން އިސްކުރަންޖެހޭ ކަމަށް ވެސް ރައީސް ވިދާޅުވިއެވެ.
މިކަންކަން ހާސިލްކުރުމަށްޓަކައި، މަޖިލީސް އިންތިހާބުގައި ސަރުކާރު ކެންޑިޑޭޓުން އިންތިހާބުކުރުމުގެ މުހިންމުކަން ރައީސް ފާހަގަކުރެއްވިއެވެ.
ކޮމެންޓް
އެއްވެސް ކޮމެންޓެއް ނެތް
