މަޖިލިސް އެމްޑީޕީއަށް ދިނުމަކީ މާލޭ ރައްޔިތުން އަމިއްލައަށް މަގުމަތިވުން: ރައީސް
20 ވަނަ މަޖިލީހުގެ މެޖޯރިޓީ އިދިކޮޅަށް ދިނުމަކީ މާލޭ ރައްޔިތުން އަމިއްލައަށް މަގުމަތިވުން ކަހަލަ ކަމެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ޕީއެންސީގެ ފަރާތުން މާފަންނު ދެކުނު ދާއިރާއަށް ވާދަކުރައްވާ އަބްދުﷲ ރިފާއު (ބޮޗޭ)ގެ ކެމްޕެއިން ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަދައްކަވަމުންނެވެ.
މާލޭގެ ރައްޔިތުންނަށް ދިމާވެފައިވާ އެންމެ ބޮޑު މައްސަލައަކީ ގެދޮރުގެ މައްސަލަކަމަށް ރައީސް ވިދާޅުވިއެވެ. އެގޮތުން މާފަންނު ދެކުނުގައި އޮތް އެންމެ ބޮޑު މައްސަލައަކީވެސް މިއީކަމަށާއި، މި މައްސަލަ ހައްލު ނުވުމުގެ ސަބަބުން ހާލުގައި ޖެހިފައި ތިބި މީހުން އެބަތިބިކަމަށްވެސް ވިދާޅުވިއެވެ. ރައީސް ވިދާޅުވީ މި މައްސަލަ ހައްލުކުރުމަށް ނަގަން ޖެހޭ ލޯނުތައް ހުންނާނެކަމަށާއި އަދި ސީދާ ޕީއެސްއައިޕީ މަޝްރޫތަކުގެ ތެރެއިން ކުރަންޖެހޭ ކަންކަން ހުންނާނެކަމަށެވެ.
މިކަންކަން ކުރުމަށް މަޖިލީހުގެ އެއްބާރުލުން މުހިންމުވާނެކަމަށް ރައީސް ދަނީ ތަކުރާރުކޮށް ވިދާޅުވަމުންނެވެ. އެކަން ކުރެވޭނީ އެކަމަށް މަގުފަހިކޮށްދޭނެ މެންބަރުން ތިބެގެންކަމަށް ރައީސް ވިދާޅުވިއެވެ.
"މިދިޔަ ހަތަރު މަސް ތެރޭގައި މަޖިލިސް ބޭނުންކޮށްގެން ސަރުކާރަށް އެކި ކަންކަމުގައި ހުރަސް ކުރިމަތިކުރި ގޮތަށް ފަސް އަހަރު އެމްޑީޕިއަށް ދީގެން މާލެ ރައްޔިތުން އަމިއްލައަށް މަގުމަތިވުން ކަހަލަ ކަމެއް އެއީ. އަޅުގަނޑަށް ޔަގީން މާލޭގެ ރައްޔިތުން ބޭނުންވާނީ މާލެއަށް ބޭނުންވާ ގޯތިގެދޮރުގެ މައްސަލަ ހައްލުވާންކަން. މާލޭގައި އިޖްތިމާއީ ގޮތުން ހައްލުކުރަން ޖެހޭ ކަންކަމަށް ހައްލު ގެނެސްދޭކަން."
ރައީސް ވިދާޅުވިއެވެ.
ތަރައްގީގެ މަޝްރޫއުތަކުގައި އާއި ޖުމްލަ ގޮތެއްގައި ހުރިހާ ކަމަކަށް މަޖިލީހުގެ އެެއްބާރުލުމާއި ރުހުން މުހިންމުއިރު، މަޖިލީސް އިންތިހާބުގައި ގައުމީ ފިކުރު އިސްކޮށް ވޯޓު ދިނުމަށް ރައީސް އެދިވަޑައިގެންނެވިއެވެ. ރާއްޖޭގައި އޮތީ މަޖިލީހާ ނުލާ ސަރުކާރު ހިންގޭނެ ނިޒާމެއް ނޫންކަން ފާހަގަކުރައްވަމުން ރައީސް ވިދާޅުވީ މި އިންތިހާބުގައި އެންމެން އެކަތި ކަނޑަކަށް ވެގެން މަސައްކަތް ކުރަން ޖެހޭ ކަމަށެވެ. އޭރުން މާ ލަސްތަކެއް ނުވެ ފެންނާނީ ކަންކަން ވެގެންދާތަންކަމަށެވެ.
އެގޮތުން ގުޅީފަޅު، ގިރާވަރުފަޅު އަދި ހުޅުމާލޭގެ އިތުރުން ރަސްމާލެފަދަ ތަންތަން ތަރައްގީކުރުމުގެ މަސައްކަތާއިއެކު މާލެ ސިޓީގެ ރައްޔިތުނާއި، މާލޭގައި ދިރިއުޅޭ ހުރިހާ ރައްޔިތުންގެ ގޯތީގެ މައްސަލަ މި ފަސް އަހަރު ނިމޭއިރު އެއްކޮށް ހައްލު ކޮށްދެއްވާނެކަމަށް ރައީސް ވިދާޅުވިއެވެ. މިކަމަށްވެސް މަޖިލީހުގެ އެއްބާރުލުން މުހިންމުކަމަށް ވިދާޅުވިއެވެ.
"ސަރުކާރުގެ މަސައްކަތް އެއްކޮށް ހުއްޓުމަށް ގެނެވޭހާ ބާރު އޮތްތަނެއް މަޖިލީހަކީ. ދުވާލަކު އެއް ފަހަރު ވަޒީރެއްގެ ނޯ ކޮންފިޑެންސް ނެގިޔަސް ސަރުކާރު ހިންގަން އުނދަގޫވާނެ ނޫންތޯ. ނޫނީ ރައީސްގެ ނޯ ކޮންފިޑެންސް ނެގުމަށް މަސައްކަތް ކުރިއަށް ހުރަސްތައް އަންނާނެ ނޫންތޯ. ދެކޮޅު ނުޖެހޭ އެތައް ގާނޫނުތަކެއް ސަރުކާރަށް ހުރަސް އެޅުމަށް ފާސްކޮށްގެން ވެސް ހުރަސް އެޅޭނެ ނޫންތޯ. ބަޖެޓް ފާސްނުކޮށްނުދިނަސް، ކޮންމެހެން ރައްޔިތުންގެ ބޭނުމަށް ނަގަންޖެހޭ ލޯނުތަކާ ލިބޭ ހިލޭ އެހީތަކުގެ ބޭނުންތައް ކުރުމަށް ވެސް އެތައް ހުރަހެއް އެޅޭނެ." ރައީސް ވިދާޅުވިއެވެ.
ސަރުކާރަށް އެހީތެރިކަން ދިނުމަށް މަޖިލީހަކީ ޒަރޫރީ ތަނެއްކަމަށް ރައީސް ވިދާޅުވިއެވެ.
ކޮމެންޓް
އެއްވެސް ކޮމެންޓެއް ނެތް
