މަޖިލީހުގައި ތިބެން ޖެހޭނީ ތަރައްގީގެ ފިކުރުގެ މީހުން، އެއީ ސަރުކާރު ކޯލިޝަންގެ މީހުން: ރައީސް
ރައްޔިތުންގެ މަޖިލީހުގައި ތިބެން ޖެހޭނީ ތަރައްގީގެ ފިކުރުގެ މީހުން ކަމަށާއި އެމީހުންނަކީ ސަރުކާރު ކޯލިޝަންގެ ކެންޑިޑޭޓުން ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި ހއ. ހޯރަފުށި ދާއިރާއަށް ވާދަކުރައްވާ ޕީޕީއެމް/ޕީއެންސީ ކެންޑިޑޭޓްގެ ކެމްޕެއިން ހަރަކާތުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ މަޖިލީހުގައި ތިބެންޖެހޭނީ ގައުމަށް ހަމަޖެހުން ގެންނަ މީހުން ކަމަށެވެ. އެއީ ސަރުކާރު ކެންޑިޑޭޓުންކަމަށް ވިދާޅުވިއެވެ. ރާއްޖޭގައި މިހާރު ބަދަލު ހިފުމުގެ ރޫހެއް ނުފެންނާނެކަމަށާއި މި ސަރުކާރުން އެ ޖާގައެއް ނުދޭނެކަމަށް އެމަނިކުފާނު ވިދާޅުވިއެވެ.
"މަޖިލީހުގައި ތިބެންވީ ތަރައްގީގެ ފިކުރުގެ މީހުން، އަޅުގަނޑުމެންނަކީ ތަރައްގީގެ ފިކުރުގެ މީހުން. މަޖިލީހުގައި ތިބެންވީ ގައުމަށް ހަމަޖެހުން ގެންނަ މީހުން، އަޅުގަނޑުމެންނަކީ ގައުމަށް ހަމަޖެހުން ގެންނަ މީހުން. މި ގައުމުގައި މިހާރު ބަދަލު ހިފުމުގެ ރޫހެއް ނުފެންނާނެ، މި ސަރުކާރުން އެ ޖާގައެއް ނުދޭނެ، އިދިކޮޅުން ފަރާތްތަކުން އަބަދު ފެންނަނީ ބަދަލުހިފުމާއި ކަންކަން ހަމަޖެހިގެން ގައުމުގައި ކުރިއަށް ނުގެންދިޔުމުގެ ރޫހު ހުރި ތަން. އެ ވިސްނުމަށް ޖާގަ ދީފިއްޔާ ގައުމަށް ހަމަޖެހުމެއް ނާންނާނެ." ރައީސް ވިދާޅުވިއެވެ.
މި ޖަލްސާގައި ދެއްކެވި ވާހަކައިގައި ރައީސް ވަނީ، މޯލްޑިވްސް އިކޮނޮމިކް ގޭޓްވޭ ޕްރޮޖެކްޓްގެ ދަށުން އިހަވަންދިއްޕޮޅުގައި ބަންކަރިންގ ހިދުމަތް ފެށުމުގެ މަޝްރޫއުއާ ގުޅިގެން ވާހަކަދައްކަވާފައެވެ. އެގޮތުން އެމަނިކުފާނު ވިދާޅުވީ، އެއީ ރާއްޖޭގައި ފަށާނެ އެންމެ ބޮޑު އިގްތިސާދީ މަޝްރޫއު ކަމަށެވެ.
ކޮމެންޓް
އެއްވެސް ކޮމެންޓެއް ނެތް
