ލާމަށް އިތުރު އެއާޕޯޓެއް!
ލ. އަތޮޅުގައި ދެވަނަ އެއަރޕޯޓެއް އޮންނަން ޖެހޭ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ލ. އިސްދޫ އަދި ކަލައިދޫ ރައްޔިތުންނާއި ބައްދަލު ކުރައްވާ މިއަދު ވާހަކަ ދައްކަވަމުންނެވެ. ރައީސް ވިދާޅުވީ އެއަރޕޯޓު އޮންނަން ޖެހޭނީ އަތޮޅުގެ ކޮން ރަށެއްގައި ތޯ ސަރުކާރުން ބަލަމުންދާ ކަމަށާއި ދިރާސާތައް ވެސް ކުރަމުންދާކަމަށެވެ. އަދި އެކަމުގައި ގޮތެއް ނިންމަވާނީ ވަރަށް ވިސްނެވުމަށްފަހު ރައްޔިތުންނަށް ފައިދާވާ ގޮތަށް ކަމަށް ވެސް ވިދާޅުވިއެވެ.
ރައީސް ވިދާޅުވީ އެ އަތޮޅަށް ޓޫރިޒަމް ފުޅާކުރައްވާނެ ކަމަށާއި އިތުރު އިންވެސްޓަރުން ވެސް ގެންނަންޖެހޭ ކަމަށެވެ. އެ މަސައްކަތުގެ ދަށުން ސަރުކާރުން އިންވެސްޓަރުންނާ ބައްދަލުކޮށްފައިވާ ކަމަށެވެ.
"މި އަތޮޅަށް އަޅުގަނޑުމެންގެ ޕްލޭންގައި އޮތީ ރައްޔިތުން ބޭނުންވާ މިންވަރަށް ޓޫރިޒަމް ގެނައުން، މި ދާއިރާއަށް ވެސް އަދި ރަށުގެ ކައިރީގައި ހުރި އެހެން ދާއިރާތަކަށް ވެސް ރަށުގެ ކައިރިއަށް ޓޫރިޒަމް ގެނައުން. އެކަން ކުރުމުގެ ޕްލޭންގެ މަސައްކަތް ފަށާ، އިންވެސްޓަރުންނާ ހަމައަށް ދެވިފައިވަނީ، މިއަހަރުގެ ތެރޭގައި ދާއިރާއަށް އައު ރިސޯޓުތައް ގެނައުން އަމާޒަކީ. އެކަމުގެ ސަބަބުން ވަޒީފާގެ ތަނަވަސް ފުރުސަތުތައް ފަހިވެގެންދާނެ" ރައީސް ވިދާޅުވިއެވެ.
ރައްޔިތުން ބޭނުންވަނީ ތަރައްޤީ އާއި ފުދުންތެރިކަން ކަމަށް ފާހަގަކޮށް ރައީސް ވިދާޅުވި ގޮތުގައި އެމަނިކުފާނު ބޭނުންފުޅުވެވަޑައިގަންނަވަނީ ހަލުވި ދުވެލީގައި ރައްޔިތުން ބޭނުންވާ ކަންކަން ކުރުމަށެވެ. އަދި އެކަމުގައި އެއްވެސް ދުވަހެއް ބޭކާރު ނުކުރައްވާނެކަން ފާހަގަކުރެއްވިއެވެ.
އިސްދޫ އަދި ކަލައިދޫގެ ތަރައްޤީއަށް ހުރި ކަންކަމަށް އިސްކަން ދެއްވާނެކަމަށް ވިދާޅުވިއެވެ. އަދި ބަޖެޓް ފާސްކޮށްފައި އޮތީ މި ސަރުކާރުން ބޭނުންވާ ގޮތަކަށް ނޫންކަމަށް ރައީސް ވިދާޅުވިއެވެ.
"މިއަހަރުގެ ވައުދުތަކުން ފުއްދަން ބޭނުންވާ ހުރިހާކަމެއް އަޅުގަނޑު ބަޖެޓްގައި ހިމެނިން އެކަމަކު ފާސްކުރީ ވަރަށް މަދު މަޝްރޫއުތައް ހެދޭ ވަރަށް ބެޖެޓް މެއި މަހު ބައެއް މަޝްރޫއުތައް ފަށަން ބޭނުންވިޔަސް އެކަން ކުރެވޭނީ އަހަރުގެ ފަހުކޮޅު ބަޖެޓާ ހެދި" ރައީސް ވިދާޅުވިއެވެ.
ރައީސް ވިދާޅުވީ މަގު ހެދުމާއި ބަނދަރުގެ މަސައްކަތާ ސްކޫލުގެ މަސައްކަތް ވެސް ބާރު ސްޕީޑުގައި މި ސަރުކާރުން ކުރިއަށް ގެންދާނެ ކަމަށެވެ.
ކޮމެންޓް
އެއްވެސް ކޮމެންޓެއް ނެތް
