އެމްޑީޕީގެ "މުސީބާތުން" ސަލާމަތްވާން މަޖިލީހުގެ މެޖޯރިޓީ ސަރުކާރަށް ދޭންޖެހޭ: އަދުރޭ
އެމްޑީޕީއަކީ ރާއްޖޭގެ ތަރައްގީއަށް ކުރިމަތިވެފައިވާ ބޮޑު ގޮންޖެހުމެއް ކަމަށާއި އެ "މުސީބާތުން" ސަލާމަތްވާން މަޖިލީހުގެ މެޖޯރިޓީ ސަރުކާރަށް ދޭންޖެހޭ ކަމަށް، ރައީސް ޑރ. މުހައްމަދު މުއިއްޒުގެ ސްޕެޝަލް އެޑްވައިޒަރު އަބްދުއްރަހީމް އަބްދުﷲ ރޭ ވިދާޅުވެއްޖެއެވެ.
ވެރިކަން ކުރާ ޕާޓީގެ ޓިކެޓުގައި ފުވައްމުލަކުގެ ތިން ދާއިރާއަށް ވާދަކުރައްވާ ކެންޑިޑޭޓުންގެ ކެމްޕެއިން ޖަލްސާގައި ވާހަކަދައްކަވަމުން، ޕީއެންސީގެ ޗެއާޕާސަންކަން ވެސް ކުރައްވާ އަބްދުއްރަހީމް ވިދާޅުވީ ދިވެހިންގެ ރާއްޖެ ބިނާކުރާއިރު ސިޔާސީ ލީޑަރުންގެ ކޯޅުމުގެ ތެރޭގައި އަބަދު ތިބެވެން ނެތް ކަމަށެވެ.
ދިވެހިންނަކީ ސިޔާސީ ލީޑަރުންގެ ކޯޅުމުގައި ފަނާވެގެންދާ ބަޔަކަށް ވެވޭކަށް ނެތްކަމަށާއި، ބޭނުންވަނީ އިހުލާސްތެރި އަދި ތަފާތުކުރުން ނައްތާލާ ވެރިންކަމަށް އަބްދުލްރަހީމް ވިދާޅުވިއެވެ. އެހެންކަމުން, އަންނަ އާދިއްތަ ދުވަހު ބާއްވާ މަޖިލިސް އިންތިހާބުގައި ޕީއެންސީ އަދި ސަރުކާރު ކެންޑިޑޭޓުން ހޮވުމަކީ ކޮންމެހެން ކުރަންޖެހޭ ކަމެއް ކަމަށް އޭނާ ވިދާޅުވި އެވެ.
ދިވެހިންގެ ރާއްޖެ ބިނާކުރަން އޮތީ ވަރަށް ބޮޑު އުއްމީދެއް ކަމަށާއި އެއީ ދިވެހިންގެ މުސްތަގިއްލު ރާއްޖެއެއް ކަމަށްވެސް ވިދާޅުވިއެވެ. ދިވެހިންގެ ރާއްޖޭގައި ކޮންމެ މީހަކަށް އަދުލު އިންސާފާއި ހަމަހަމަކަން ގާއިމު ވެގެންދާނެތީ، އެ ހުރިހާ ކަމެއްގައި ވެސް އެންމެ ބޮޑު އެއްބާރުލުމެއް ބޭނުންވާނީ މަޖިލީހުގެ ތެރެއިން ކަމަށް އަބްދުއްރަހީމް ވިދާޅުވި އެވެ.
ދެކޮޅު ނުޖެހޭ ވާހަކަ ދައްކައިގެން އިދިިކޮޅު ފަރާތްތަކުން އޮޅުވާލަން މަސައްކަތްކުރި ނަމަވެސް އެ މަސައްކަތް ކާމިޔާބު ނުވާނެކަން ރިޔާސީ އިންތިހާބުން އެނގުނު ކަމަން ފާހަގަކުރައްވައި އަބްދުއްރަހީމް ވަނީ ހަމަނުޖެހޭ ވާހަކަ ދައްކައިގެން ރައްޔިތުން ހައްލައިގެން ދިވެހިންގެ ރާއްޖޭގެ އަމާންކަން ނައްތާލުމުގެ ޖާގަ ދީގެން ނުވާނެ ކަމަށް ވިދާޅުވެފަ އެވެ.
"އެމްޑީޕީއަކީ ދިވެހި ރާއްޖޭގެ ރައްޔިތުންނަށް ކުރިމަތިވެފައި އޮތް ބޮޑު މުސީބާތެއް. ދިވެހިރާއްޖޭގެ މިނިވަންކަމަށް ކުރިމަތިވެފައި އޮތް ވަރަށް ބޮޑު ގޮންޖެހުމެއް. ދިވެހިރާއްޖޭގެ ތަރައްގީއަށް ކުރިމަތިވެފައި އޮތް ވަރަށް ބޮޑު ހުރަހެއް. އެހެންވީމަ, އެ ހުރަސްތައް ނައްތާލައި އެ ގޮންޖެހުންތައް ގިރާކޮށް އެ މުސީބާތުން ސަލާމަތްވުމަށްޓަކައި ދިވެހިންގެ ރާއްޖޭގެ ސަރުކާރެއް ގާއިމްކުރަން, ދިވެހިންގެ ވެރިއަކު ރައްޔިތުންގެ މަޖިލީހަށް ދޭންވީ." ފުވައްމުލަކު ހާފިޒު އަހުމަދު ސްކޫލު ހޯލުގައި ބޭއްވި ރަސްމިއްޔާތުގައި އޭނާ ވިދާޅުވި އެވެ.
ފާއިތުވި ފަސް އަހަރު އޭރުގެ ސަރުކާރާ ދެކޮޅަށް ރޭގަނޑާއި ދުވާލު މަގުމައްޗަށް ނުކުތީ ފަސް ހަ މީހުންނާއެކު ކަމަށާއި އޭރު ތިބީ ވަރަށް ދަތި ހާލުގައި ކަމަށް އަބްދުލްރަހީމް ވިދާޅުވިއެވެ. ހަމަ އެ މުއްދަތުގެ ތެރޭގައި ކަންތައް ވި ގޮތް ފެންނާނެކަމަށާއި، ޕީޕީއެމް/ޕީއެންސީ ފިކުރު ދަމަހައްޓަން މަސައްކަތްކުރީ ކޮން ބައެއްކަން ވެސް އެނގޭނެ ކަމަށް އޭނާ ވިދާޅުވި އެވެ. ނަމަވެސް، މަގުމަތީގައި އޭރު ތިބި މީހުން ފެންނަން ތިބިތޯ އަބްދުއްރަހީމް ސުވާލު އުފެއްދެވި އެވެ.
"މި ވާހަކަ ދައްކަވަނީ ގައުމަށް ޣައްދާރުވާން މަސައްކަތްކުރާތީ. ދިވެހިންގެ ރާއްޖެއަށް ހިތްހަމަޖެހޭ ބަދަލެއް ގެންނަ ނަމަ މަޖިލީހަށް ސަރުކާރު ވިސްނުމުގެ ބޭފުޅުން ހޮވަންޖެހޭ."
އަބްދުއްރަހީމް ވިދާޅުވީ ތަރައްގީގެ އިންތިޒާރުގައި ފުވައްމުލަކު ރައްޔިތުން ވެސް ތިބޭތާ އެތައް އަހަރެއް ވެއްޖެކަމަށެވެ. ކުޑަ ރަށެއް ބޮޑު ރަށެއް ތަފާތު ކުރުމެއް ނެތި، މިދިޔަ ފަސް އަހަރުގެ ތެރޭގައި ނުކުރެވުނު ކަންތައް އެންމެ ފަސް މަސް ދުވަހުގެ ތެރޭގައި ކޮށް ނިންމާފައިވާ ކަމަށް ވެސް ވިދާޅުވި އެވެ.
ކޮމެންޓް
އެއްވެސް ކޮމެންޓެއް ނެތް
